.
pdf en castelán: De Abadín a Vilalba
.
SITUACIÓN: Concellos de Abadín e Vilalba (Lugo)
PUNTO DE PARTIDA: Abadín
ACCESO: Abadín está situado xunto a estrada nacional 634
HORARIO: 4/5 horas DESNIVEL: Inapreciable
DISTANCIA: 20,5 km DIFICULTADE: Baixa
TIPO DE ROTA: Travesía MAPAS: I.G.N. 24 – III – 23 – IV – 47 – II
SINOPSE: O itinerario transcorre a unha altura entre 400 e 500 metros, case sen desniveis. O camiño caracterízase por descorrer entre praderías principalmente, moitas delas cerradas con laxas postas de pé, e algunhas carballeiras, atravesando dous ríos por unha ponte de madeira e outra de pedra.
DESCRICIÓN DA ROTA: A saída de Abadín, xunto a oficina de correos, marca o comezo deste percorrido de moi fácil andar. Seguimos por unha ancha pista ata coller un camiño a man dereita que se interna entre carballos cruzando máis tarde o río Abadín por unha ponte de madeira.
Despois dunha pequena subida chegamos a unha pista asfaltada con rectas prolongadas que se vai alternando con algún camiño máis sombrío ata a aldea de Martiñán. Aquí temos que cruzar a estrada N – 634 para máis tarde atravesar o río Batán pola Ponte Vella de Martiñán, unha ponte característica da Terra Chá.
Este lugar ten un encanto especial que invita ao camiñante a facer unha parada xunto a área recreativa que existe neste lugar escoitando o murmuro da auga no medio do frondoso bosque de ribeira.
O camiño con grandes tramos rectos, vai paralelo a estrada onde a cruzamos a altura de Goiriz, tendo que camiñar por ela uns 100 metros ata que o camiño sae a dereita, man que non abandona ata Vilalba.
Temos que por especial atención ao atravesar as obras da autoestrada, para atopar ao outro lado o camiño.
Unha vez que chegamos ao polígono de Vilalba, temos que desandar un pequeno traxecto pola beira da estrada N – 634 ata o restaurante Montero, onde nos agarda o autobús.
Etiquetas: Abadín, Lugo, Sendeirismo, Vilalba
