SITUACIÓN: Camaleño (Cantabria) e Boca de Huérgano (León)

PUNTO DE PARTIDA: Porto de San Glorio ( 1.600 m)

ACCESO: Dende Potes pola estrada N – 621

HORARIO: 4 h DESNIVEL: 550 m

DISTANCIA: 9 km DIFICULTADE: Baixa

TIPO DE RUTA: Ida e volta MAPAS: I.G.N. 81 – I – III

SINOPSE: O Coriscao é un dos cumes da Cordilleira Cantábrica máis achegado aos Picos de Europa polo que dada a súa proximidade e altura convértese nun miradoiro privilexiado dende o que podemos ver as vertentes Sur dos tres macizos, especialmente do Central e Oriental. A subida ao Coriscao é fácil dada a altura de partida dende o porto de San Glorio que é o paso máis alto en estrada asfaltada da Cordilleira Cantábrica.

DESCRICIÓN DA RUTA: Saímos do porto de San Glorio (1.600 m) cara ao Nordeste por pista de formigón que atravesa cara a dereita a base dunha primeira lomba na divisoria cara ao Coriscao e sobe moi suavemente ata o miradoiro de Llesba (1.670 m), balcón privilexiado dos Picos de Europa. Neste lugar comeza a subida máis habitual ao Coriscao, tendo que coller á esquerda un sendeiro que remonta pola divisoria herbosa.

Pasamos unha primeira cota secundaria, baixando un pouco á dereita a un cimbro herboso e remontando ao seguinte contraforte (pendente e con breixos) que esfumiñan o sendeiro.

Na parte alta entramos á dereita para evitar unha subida incómoda, e nesa dirección subimos a costa que coroa nun cume con dúas pedras de sinalización (1.890 m). Un sendeiriño baixa agora en dirección Noroeste, curto e pendente, por unha zona herbosa que chega ao cimbro ao pé da Peña Gustal, curiosa elevación protexida por varias torres de conglomerado rochoso.

No comezo remontamos pola súa ladeira cara á esquerda, evitando unhas rochas por un sendeiro que se dirixe a un amplo cimbro ( 1.870 m) situado entre esta cota e o Cascajal.

Vemos a seguinte e pronunciada costa que sobe por trazas de sendeiro, evitando á dereita un sector rochoso. Rodeamos a cimeira remontando unha forte pendente de herba e rochas que se suaviza máis arriba bruscamente no cume do Cascajal (2.030 m).

Seguimos polo cordal, fácil no seu comezo, pero logo convértese nun caos de bloques que rematan antes do cimbro do Alto de Veloso (1.953 m) porta de subida ao Coriscao.

Pasamos polo Sur unha dobre prominencia antes de acometer, polo cordal, o comezo da rampla. Un sendeiro con marcas amarelas axúdanos nos primeiros metros, que logo perdemos ao incrementarse a pendente que pode chegar aos 35 graos de inclinación, evitando achegarnos ao Norte, rematamos no cume do Coriscao (2.234 m).